Redmi Note 15 Pro+ haqqında ilk məlumatlar yayıldı

Redmi Note 15 Pro+ modelindən ilk sızıntılar: 8000 mAh-a yaxın batareya ilə gəlir

Redmi Note 15 Pro+ modelinə dair ilk detallı məlumatlar ortaya çıxıb. Bildiyiniz kimi, Redmi Note 14 Pro+ modeli keçən ilin sentyabrında Çində təqdim edilmişdi. İndi isə onun davamçısı olacaq Redmi Note 15 Pro+ üçün hazırlıqlar gedir və artıq bəzi xüsusiyyətlər məlumdur.

Yeni modelin "1.5K" təsvir ölçülü ekranla, hər tərəfdən nazik və simmetrik çərçivələrlə gələcəyi deyilir. Kameralara gəldikdə, həm əsas, həm də telefoto kamera 50 MP olacaq. Ən diqqət çəkən cəhətlərdən biri isə batareya tutumunun 7,000 mAh ilə 7,999 mAh arasında olmasıdır ki, bu da əvvəlki modellərlə müqayisədə ciddi irəliləyiş deməkdir.

Redmi Note 15 Pro+ modelinin hələ təqdim olunmayan Snapdragon 7s Gen 4 prosessoru ilə təchiz olunacağı gözlənilir. Bu, tam məntiqlidir, çünki əvvəlki nəsil Snapdragon 7s Gen 3 ilə gəlmişdi.

Yəni, Redmi Note 14 Pro+ ilə müqayisədə yeni model eyni ekran və kamera təsvir ölçülərini saxlayacaq, lakin daha güclü çipset və xeyli böyük batareya ilə gələcək. Bu yeniliklərin kifayət qədər irəliləyiş olub-olmadığı isə rəsmi təqdimatdan sonra bilinəcək.

Qeyd edək ki, bu müqayisə Çin və Hindistan bazarlarında təqdim olunan Redmi Note 14 Pro+ modelinə əsaslanır. Redmi brendi bəzi regionlarda eyni adla fərqli modellər təqdim etdiyi üçün bu detal mühümdür. Amma bu halda fərqliliklər elə də böyük deyil.